Dilli Abhi Dur Hai

Dilli abhi dur hai
i
Kehne ko beet gaye varsh anek.
Chale gaye angrez aur unki satta.
Kehne ko Swatantra hain aaj hum purntah.
Nahi hain gulami ki janzeero tale dabe aaj hum.
Naa hi hain bediya paanv mei aaj.

Aaj hum mann marji se jee sakte hain.
Raatri ho chahe din,  bahar reh sakte hain.
Mahila ho ya purush, khwaishon ko pura karne
Ka khwaab aaj hum sab dekh sakte hain.
Khwaabo ko pura karne ka dam hum sab rakhte hain.

Jeevan ko sapno se sajaane ki aasha mujhme bhi hai.
“Tum azaad ho”, meri maa mujhe roz kehti hain.
Isi seekh ke saath aaj main kadam badha rahi hu.
Apne astitva ki ek nayi pehchan khojne chali hun.
Kuch kar gujarne ki tamanna lekar, vyavsaay dhundhne chali hun.
ii
Khush hu, pehle hi din naukri mil gayi,
Meri kaabiliyat aaj rang laayi.
Wo kehne lage tum accha likhti ho,
Nek soch hai tumhari, mehnati bhi kam nahi ho.
Par ek maang thi unki jisne mujhe sochne pe majboor kar diya.

Us maang ne mere astitva par sawaal utha diye.
Kya main sirf uske bistar par sone ki naukri dhundh rahi thi?
Kya usse lekhak ki sach mei zarurat thi?
Aurat ko aaj bhi is tarah dekha jaa raha hai,
Aurat ko aaj bhi khilona samajha jaa raha hai.
Bahar to kadam rakh diya hai humne,
Lekin manjil abhi dur hai.
Dilli abhi koso dur hai.

Main sochne par majboor hun,
Kitni dur, kitni paas hain aaj hum
Asli azaadi se. Par haar nahi maani hai.
Haar nahi maanungi. Kadam badhae jaungi.